Gousberg Champagne Castle

Welkom in die Drakensberge! Ervaar nuwe hoogtes.

‘n Berghuis geleë teenaan die Klein-berg - dit is die voetheuwels waarvandaan die majestueuse pieke verreis. Sit op die gras, en ervaar die berg in sy volle glorie.

Jangroentjies, Janfrederikkies en gryskopkanaries dartel deur die bome op die werf. Rooiborsslangarende patroleer die kranse, en dan en wan maak die skaars Baard-aasvoël ‘n lui draai al langs die kranse af. As jy baie gelukkig is, kan jy selfs ‘n bosbokram en -ooi uit die inheemse bos sien kom en teen die helling loop en wei.

Aangrensend aan die wildernisgebied, is die stap-kontoerpad slegs 50 meter van die huis af. Vanaf ander blyplekke neem mens ‘n goeie twee of meer ure se stap om naby die berg te kom, en daarna kan mens eers in die berg instap. Hier is jy teenaan die berg, en kan mens bloot dieper in die berg instap, of tot bo-op die Kleinberg en die pieke klim. Nader aan die berg kan jy beswaarlik kom. Daarom sê ons: Die luuksheid setel in die ligging. Kontak ons indien julle in ‘n bergvakansie belangstel.

Kontak inligting